અમદાવાદ શહેરના પોશ વિસ્તાર નવરંગપુરામાં જમીન અને પ્રોપર્ટીના સોદાના બહાને સામાન્ય વેપારીઓ સાથે મસમોટી ઠગાઈ આચરવામાં આવી હોવાની ચોંકાવનારી ઘટના પ્રકાશમાં આવી છે. નવરંગપુરા પોલીસ સ્ટેશનમાં નોંધાયેલા બે અલગ-અલગ પ્રથમ માહિતી અહેવાલ (FIR) પરથી એવું સ્પષ્ટ થયું છે કે, ભરતકુમાર પ્રાણલાલ પોપટ અને તેમના પત્ની હર્ષાબેન ભરતકુમાર પોપટ સહિતના શખ્સોએ વેપારીઓનો વિશ્વાસ જીતીને કરોડો રૂપિયાની રકમ સેરવી લીધી છે. આ ગંભીર પ્રકરણમાં પોલીસે ભારતીય નાગરિક સુરક્ષા સંહિતા (BNSS) તેમજ BNSનીકલમો અન્વયે ગુનો નોંધીને કાયદેસરની તપાસ આરંભી છે.

સાણંદના પ્લોટ સોદામાં રૂ. ૨.૩૪ કરોડની છેતરપિંડી

પ્રથમ પોલીસ ફરિયાદ બોપલ વિસ્તારમાં રહેતા ૬૩ વર્ષીય વેપારી સંજય જયંતિલાલ મહેતા દ્વારા નોંધાવવામાં આવી છે. આ પ્રકરણ મુજબ, સાણંદ તાલુકાના મણિપુર ગામની સીમમાં આવેલી ‘સુરધારા રેસિડેન્શિયલ પ્લોટ્સ’ સ્કીમના પ્લોટ નં. ૩૭ અને ૩૮ ના વેચાણ બાબતે આ ઠગાઈ આચરવામાં આવી હતી. સુવાસ ઇન્ફ્રાસ્ટ્રક્ચર પ્રાઇવેટ લિમિટેડના બિલ્ડર પાસેથી આ પ્લોટો ખરીદેલા હોવાનું જણાવી આરોપીઓએ સમગ્ર સોદો પાર પાડ્યો હતો. આ કેસમાં સી.જી. રોડ અને નવરંગપુરા ખાતે કાર્યાલય ધરાવતા ભરતકુમાર પ્રાણલાલ પોપટ, તેમના પત્ની તથા બિઝનેસ પાર્ટનર હર્ષાબેન પોપટ અને અન્ય ભાગીદાર વિલેશ પ્રફુલચંદ્ર શેઠ વિરુદ્ધ કાનૂની શિરોસ્તો અપનાવાયો છે.

તપાસમાં ખૂલેલી વિગતો અનુસાર, આરોપીઓએ પ્લોટના સોદા પેટે એડવાન્સમાં રૂ. ૧,૨૫,૦૦,૦૦૦ મેળવી લીધા હતા. નક્કી થયા મુજબ બાકીની રકમ સામે ૮ મહિનામાં બિલ્ડિંગ મટીરિયલ આપવાનું હતું, પરંતુ માત્ર ૩ મહિના સુધી જ નામમાત્ર મટીરિયલ અને રોકડ રકમ આપીને બાકી નીકળતી રૂ. ૨,૩૪,૦૦,૦૦૦ જેવી માતબર રકમ દબાવી દેવામાં આવી હતી. એટલું જ નહીં, સિક્યોરિટી પેટે આપવામાં આવેલા ચેકોમાં અગાઉથી જ ‘સ્ટોપ પેમેન્ટ’ કરાવી દેવાયું હતું અને ફરિયાદીને અન્ય પ્રોપર્ટીઝ બતાવવાના બહાના ધરીને લાંબા સમય સુધી માત્ર ખોટા વાયદાઓ જ આપવામાં આવ્યા હતા.

અસારવા-મુઠીયાની મોર્ગેજ જમીન બતાવી રૂ. ૨.૫૦ કરોડ પડાવ્યા

આ મામલાની બીજી FIR સેટેલાઇટમાં રહેતા અને વ્યવસાય સાથે જોડાયેલા ૩૭ વર્ષીય પાર્થ કમલેશભાઈ દોશી દ્વારા નોંધાવવામાં આવી છે. નવરંગપુરાના સેતુ અવંતી કોમ્પ્લેક્સ ખાતે આવેલી ઓફિસેથી ભરતકુમાર પોપટે ફરિયાદીને અસારવા તાલુકાના મુઠીયા ગામની સીમના સર્વે નંબરોવાળી બિનખેતીની જમીન સસ્તા ભાવે અપાવવાની લાલચ આપી હતી. આ જમીન અગાઉ GIDC નરોડા ઇન્ડસ્ટ્રીયલ એસ્ટેટ તરીકે ઓળખાતી હતી અને કર્ણાવતી ઓટો હબ પ્રાઇવેટ લિમિટેડના પ્રોપરાઈટર પાર્થ બારોટના નામ પર બોલતી હતી. આ કેસમાં મુખ્ય સૂત્રધાર ભરતકુમાર પોપટ ઉપરાંત પાર્થ બારોટ, ઝીલ ભરત પોપટ અને પરાગ શાહ વિરુદ્ધ ગુનો નોંધાયો છે.

આ જમીન અગાઉથી જ આદિત્ય બિરલા ગ્રૂપમાં મોર્ગેજ (ગીરો) રાખેલી હોવાની હકીકત સંપૂર્ણપણે છુપાવવામાં આવી હતી. પૂર્વઆયોજિત કાવતરાના ભાગરૂપે આરોપીઓએ ફરિયાદી પાસેથી ઓનલાઈન ટ્રાન્સફર, આંગડિયા તેમજ રોકડ સ્વરૂપે કુલ રૂ. ૨,૫૦,૦૦,૦૦૦ પડાવી લીધા હતા. તારીખ ૧૮/૧૧/૨૦૨૫ ના રોજ બાનાખત પણ કરી અપાયું હતું અને વિશ્વાસ કેળવવા માટે જમીન પર ફરિયાદીના નામની જાહેર નોટિસ પણ લગાડવામાં આવી હતી. પાછળથી અખબારોમાં ઓક્શન અંગેની જાહેર નોટિસ પ્રસિદ્ધ થતાં જ આ ભાંડો ફૂટ્યો હતો કે જમીન તો બેંકમાં પહેલેથી જ મોર્ગેજ છે. ત્યારબાદ આરોપીઓએ ન તો જમીન મુક્ત કરાવી કે ન તો નાણાં પરત કર્યા હતા.

આરોપીઓની શોધખોળ માટે પોલીસનું સઘન અભિયાન

બંને પ્રકરણોમાં આરોપીઓએ વેપારીઓને ભરોસામાં લઈને તેમની સાથે આર્થિક વિશ્વાસઘાત આચર્યો છે. નવરંગપુરા પોલીસે આ મામલે ગુનાહિત કલમો હેઠળ ગુનો નોંધીને તપાસની જવાબદારી પોલીસ ઇન્સ્પેક્ટર એન.એ. દેસાઈને સોંપી છે. હાલ સમગ્ર કેસમાં ભૂગર્ભમાં ઉતરી ગયેલા કૌભાંડી દંપતી અને તેમના સાગરીતોને સત્વરે ઝડપી પાડવા માટે પોલીસ દ્વારા ટેક્નિકલ સર્વેલન્સ અને સઘન તપાસના ચક્રો ગતિમાન કરવામાં આવ્યા છે.